Karnavalet kthyen çdo rrugë dhe shesh të Korçës në skenën nga ku shpërthyen ngjyrat, ritmet dhe fabulat të cilat shpërfaqën traditat shekullore. 22 grupe artistike vendase dhe 6 grupe nga Greqia, Mali i Zi, Bullgaria dhe Polonia u bënë pjesë e tyre.
Paradës iu bashkuan banorë të qytetit dhe vizitorë të fundjavës. Nga personazhet e mitologjisë, heronjtë e historisë, simbole teatrale dhe deri tek fabula stigmatizuese të fenomeneve aktualë, çdo hap i paradës, ishte një histori plot mbresa dhe emocione.
Artistët nga Bullgaria dhe Greqia sollën në Festival fabula interesante nga tradita e vendeve të tyre
“Ne vijmë nga Bullgaria. Ky është grupi ynë që përfaqëson një dasmë tradicionale bullgare. Me veshjet tona, ne trembim shpirtrat e këqij dhe bëjmë që të dukemi të frikshëm, që ti largojmë ata. Është hera jonë e parë këtu, është me të vërtetë shumë bukur.”
“Ne vijmë nga Greqia dhe jemi ëngjëj të Parajsës. Jemi shumë të lumtura që po përfaqësojmë shtetin tonë. Është hera jonë e parë këtu. Është e mrekullueshme. Njerëzit këtu janë shumë të sjellshëm, na pëlqen shumë qyteti. Faleminderit shumë që na mirëpritët.”
Atmosfera e veçantë zgjati deri në mesnatë. Festivali i Karnavaleve u mbyll me “Carnaval Party” në “Pazarin e Vjetër”./abcnews.al
