Rreth 1.7 milionë vezë janë tërhequr nga tregu në Shtetet e Bashkuara pasi dyshohet se ishin me salmonelë.
Qendrat për Kontrollin dhe Parandalimin e Sëmundjeve dhe Administrata Amerikane e Ushqimit dhe Barnave po hetojnë përhapjen e Salmonelës në shumë shtete.
Deri më tani, janë sëmurur 79 persona në New Jersey, Kentucky, Nebraska, Nevada, Arizona, shtetin e Uashingtonit dhe Kaliforni. Të paktën 21 persona janë shtruar në spital dhe nuk janë raportuar vdekje.
Vezët u shpërndanë nga Kompania e Vezave August nga 3 shkurti deri më 15 maj tek shitësit me pakicë në nëntë shtete.
Salmonela është një lloj bakteri që mund t’i sëmurë njerëzit nëse konsumojnë ushqim dhe ujë të kontaminuar, ose prekin kafshët, lëndën e tyre fekale ose zonat ku jetojnë.
Simptomat përfshijnë diarre, ethe dhe dhimbje stomaku dhe mund të fillojnë gjashtë orë deri në gjashtë ditë pas konsumimit të baktereve. Fëmijët nën pesë vjeç, të moshuarit dhe njerëzit me sistem imunitar të dobësuar mund të sëmuren rëndë si pasojë e infektimit me salmonelë.
Qendra për Kontrollin dhe Parandalimin e Sëmundjeve këshilloi këdo që ka vezë të tërhequra nga tregu në shtëpinë e tij t’i hedhë ato ose t’ia kthejë shitësit me pakicë ku i blenë. Bizneset me vezë të tërhequra nga tregu nuk duhet t’i shesin ose t’i shërbejnë ato dhe duhet të dezinfektojnë çdo send ose sipërfaqe që ka rënë në kontakt me vezët.
