Një sulm me artileri nga forcat ruse goditi një spital në qytetin jugor të Ukrainës, Herson, e duke shkatërruar institucionin mjekësor dhe duke plagosur disa civilë, sipas zyrtarëve rajonalë.
Guvernatori rajonal i Hersonit, Oleksandr Prokudin, tha të mërkurën se pesë pacientë dhe tre infermiere u plagosën kur ndërtesa u godit gjatë natës.
Një infermiere 44-vjeçare pësoi lëndime nga shpërthimi, tronditje dhe plagë në gjoks dhe ndodhet aktualisht në spital, ashtu si edhe katër pacientë të tjerë. Të tjerët morën ndihmë mjekësore dhe më pas u liruan nga spitali.
Spitali u godit gjatë një sulmi më të gjerë rus ndaj infrastrukturës civile në rajonin e Hersonit gjatë 24 orëve të fundit.
Prokudin tha se lagjet e banuara, përfshirë godina shumëkatëshe dhe 11 shtëpi private, u dëmtuan nga sulmet. Një biznes, një autobus, disa makina dhe një strukturë bujqësore gjithashtu pësuan dëme. Dhjetë persona raportohet se janë plagosur nga sulmet.
Sulme janë raportuar gjithashtu në fshatin Antonivka pranë Hersonit, si dhe në Nikopol në rajonin e Dnipropetrovskut.
